Sutəmizləyici Qurğular Kompleksində filtrlər yenilənib
NUHÇIXAN xəbər verir ki, Naxçıvan Şəhər Su Anbarı və Sutəmizləyici Qurğular Kompleksində payız-qış mövsümünə hazırlıqla bağlı bir sıra işlər görülüb. Naxçıvan şəhərinin, eləcə də ətraf kəndlərin içməli su ilə təmin edən Naxçıvan Şəhər Su Anbarı və Sutəmizləyici Qurğular Kompleksi mühüm əhəmiyyət daşıyır. Bu mühüm hidroobyektdə suyun təmizlənməsi üçün ən müasir qurğu və avadanlıqlardan istifadə olunur. Üçqat təmizləmənin aparıldığı kompleksdə Hollandiya istehsalı olan müasir avadanlıqlar quraşdırılıb. Nanofiltir sistemli membranlar vasitəsilə xətlərə verilən suyun tərkibi təbii bulaq suyu qədər təmizlənir. Su təmizləndikdən sonra yaxınlıqdakı su anbarına yığılıb, oradan əhalinin istifadəsinə verilir. Beləliklə, əldə olunmuş keyfiyyətli içməli su müasir tələbləri ödəməklə yanaşı, məişət avadanlıqlarının və evlərdə istifadə olunan su xətlərinin vaxtından əvvəl sıradan çıxmamasında da mühüm rola malikdir. Kompleksdə payız-qış mövsumuna hazırlıqla bağlı 288 membran filtiri yenilənib. 2000 kartuş filtiri alınaraq yeniləri ilə əvəz edilib.
Suyun sərfinə, təzyiqinə, elektrik keçiriciliyinə və bulanıqlığına idarəetmə mərkəzində quraşdırılmış kompüterlə nəzarət olunur və iş prosesi avtomatik idarə edilir. Kompleksin laboratoriyasında quraşdırılan müasir avadanlıqlar suyun tərkibinə gündəlik nəzarət etməyə və analizlər aparmağa imkan verir.
Cavid Səfərli