Şahbuzda mərasim evləri tikilir
Son illər muxtar respublikada yas mərasimlərinin əksəriyyəti əsasən inşa edilən xüsusi mərasim evlərində təşkil olunur. Bu evlərin tikintisi sakinlərin yas mərasimlərini rahat şəkildə keçirməsinə şərait yaradır və əlavə xərclərin yaranmasının qarşısını alır.
NUHÇIXAN xəbər verir ki, Şahbuz rayonun 7 kəndində bu məqsədlə mərasim evləri tikilir. Rayonda bu işdə dövlətlə yanaşı, sahibkarlar, kəndlərin imkanlı sakinləri də fəallıq göstərirlər.
Hazırda rayonun Yuxarı Qışlaq və Sələsüz kəndlərində inşa olunan mərasim evlərində işlər yekunlaşmaq üzrədir. Kükü, Aşağı Qışlaq, Mahmudoba, Kolanı və Şada kəndlərində isə inşa olunan mərasim evlərində işlər davam etdirilir. Bir qayda olaraq , mərasim evlərində qadın və kişilər üçün ayrı-ayrı zallar, mətbəx, namaz otağı və digər otaqlar yerləşir.
Qeyd edək ki, hazırda Şahbuz şəhərində də iki mərasim evi fəaliyyət göstərir.