Qazançı kəndi abadlaşır
NUHÇIXAN xəbər verir ki, Culfa rayonunun Qazançı kəndində kompleks quruculuq işləri davam etdirilir. Burada 216 şagird yerlik 3 mərtəbəli məktəb binası tikilir. Məktəbdə 12 sinif otağı, kimya, biologiya və fizika laboratoriyaları, 2 elektron lövhəli sinif, şahmat sinfi, komputer otağı, hərbi kabinə, kitabxana və idman zalı yaradılır.
Kənddə inşa olunan xidmət mərkəzində isə əhaliyə müxtəlif ticarət və məişət xidmətləri göstəriləcək.
Qazançıda kənd mərkəzi də yenidən qurulur. Zirzəmi ilə birlikdə 3 mərtəbədən ibarət olan mərkəzdə dövlət qurumlarının səmərəli fəaliyyəti üçün lazımi şərait yaradılır. Burada fəaliyyət göstərəcək həkim ambulatoriyası kənd əhalisinin keyfiyyətli səhiyyə xidmətindən yararlanmasına imkan verəcək.
Qeyd edək ki, kənddə tarixi memarlıq abidəsi olan Qazançı körpüsü də bərpa olunur. Körpü yonulub hamarlanmış daş parçalarından tikilib. Hazırda körpüdə bərpa işləri aparılır.
Əbülfəz Dünyamalıyev