Naxçıvanlı jurnalistlərin yazıları Türkiyə mediasında

NUHÇIXAN xəbər verir ki, Türkiyənin İğdır vilayətində nəşr olunan “Güven”  və “İğdır” qəzetlərində  “Araz-Türk Cumhuriyyəti” adlı məqalə verilib. Naxçıvan Televiziyasının Baş redaktorları olan Vaqif Ağalarov və Səməd Canbaxşiyevin həmmüəllifi olduğu yazıda Naxçıvanın dövlətçilik tarixində önəmli yer tutan Araz-Türk Respublikasından bəhs edilir. Yazıda 1918-ci ilin noyabrında yaradılan və sərhədləri indiki Naxçıvan Muxtar Respublikasını, Qərbi Azərbaycanın İrəvan və Türkiyənin indiki İğdır vilayətinin bir hissəsini əhatə edən, paytaxtı Naxçıvan şəhəri olan  Araz-Türk Respublikasının yaranma zərurəti, coğrafi əraziləri, idarəçilik sistemi və xarici əlaqələri barədə türkiyəli oxuculara  ətraflı məlumat verilir. O da vurğulanır ki, Araz-Türk Respublikası əhatə etdiyi coğrafiyada  imperialist qüvvələr tərəfindən dəstəklənən və burada qondarma “erməni dövləti” yaratmaq istəyənlərə qarşı kəskin mübarizə aparıb və qədim oğuz-türk yurdu olan bu ərazilərin qorunmasında misilsiz xidmətlər göstərib. 1919-cu ildə Osmanlı və Rusiya arasında Şərqlə bağlı imzalanan  müqaviləyə görə,  Araz-Türk Respublikası həmin ilin mart ayında süqut etdi. Amma o,  tarixə 20-ci əsrin əvvəlində, regionda çox gərgin siyasi mübarizələrin və maraqların toqquşduğu bir zamanda Naxçıvan ərazisində yaradılan müstəqil respublika kimi adını yazdırdı.