Milax-Ləkətağ marşrut xətti Boyəhməd kəndinə qədər uzadılıb

NUHÇIXAN xəbər verir ki, Naxçıvan Şəhər Nəqliyyat İdarəsində qarşıdan gələn aylarda avtomobil nəqliyyatı sahəsində xidmətin intensivliyinin təmin edilməsi və yaranmış çətinliklərin aradan qaldırılması üçün seminar-müşavirə  keçirilib.

Tədbirdə qeyd edilib ki, payız-qış aylarnda avtonəqliyyat vasitələri ilə təhlükəsiz sərnişindaşınması, marşrut qrafikinə nəzarət olunması məqsədilə yeni nəsl texnologiyalarından istifadə edilməsi işi də diqqətdə saxlanılır. Belə ki, hazırda Naxçıvan-Bakı marşrutunda işləyən avtobusların hamısına NAXTEL-4G GPS monitorinq izləmə sistemi quraşdırılıb. Naxçıvan şəhərdaxili marşurutunda işləyən avtobuslara və taksilərə isə GPS-lərin quraşdırılması işi davam etdirilir.

Tədbirdə iştirak edən Dövlət Nəqliyyat Xidmətinin sektor müdiri Zaur Əliyev vurğulayıb ki, təmsil etdiyi qurumun payız-qış mövsümünə hazırlıq komissiyası Sədərək rayonunun Heydərabad qəsəbəsində, Sədərək kəndində, Culfa rayonunun Ləkətağ, Boyəhməd kəndində  olub. Vətəndaşların rahatlığı üçün Milax-Ləkətağ marşrut xətti Boyəhməd kəndinə qədər uzadılıb.

Qeyd edək ki, hazırda Naxçıvan Şəhər Nəqliyyat İdarəsinə məxsus 23 NAZ-Lifan markalı taksi və 68 iritutumlu avtobus, eyni zamanda  fiziki şəxslərlə bağlanmış “icarə” müqaviləsi əsasında 36 mikroavtobus və 1 Mitsubişi markalı avtobus vətəndaşlara  sərnişindaşıma xidməti göstərir.

                                                                                   Gülməmməd Əliyev