İlk dəfə dövlət qulluğuna qəbul olunan dövlət qulluqçuları and içiblər

Muxtar respublikada Dövlət Bayrağı Muzeyində Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən dövlət orqanlarında inzibati vəzifələrin dördüncü-yeddinci təsnifatına uyğun vakant dövlət qulluğu vəzifələrinin tutulması üçün martın 5-də elan olunmuş müsabiqədə müvəffəqiyyət qazanaraq ilk dəfə dövlət qulluğuna qəbul olunan 44 dövlət qulluqçusunun təntənəli andiçmə mərasimi olub.

NUHÇIXAN xəbər verir ki, tədbirdə komissiyanın sədri İsmayıl Qəribli çıxış edərək son illər muxtar respublikada müasir tələblərə cavab verən dövlət qulluğu sistemi formalaşdırıldığını, “Elektron hökumət” portalı, Vətəndaşların Müraciətləri üzrə Elektron Qeydiyyat və İdarələrarası Elektron Sənəd Dövriyyəsi sistemlərinin istifadəyə verildiyini, bəzi dövlət orqanları üzrə səyyar xidmətlərin təşkil edildiyini bildirib.

İsmayıl Qəribli deyib: Dövlət orqanları üçün ən müasir standartlara cavab verən yeni inzibati binaların tikilməsi və maddi-texniki bazanın gücləndirilməsi, dövlət quluqçularının fəaliyyətinin yaxşılaşdırılması, onlara lazımi iş şəraitinin yaradılması, işində fərqlənən dövlət qulluqçularının təltif edilməsi dövlət qulluğu sahəsinə göstərilən diqqət və qayğının bariz nümunəsidir.

Muxtar respublikada dövlət qulluğunun səmərəli təşkili və idarə olunması məsələlərindən danışan İsmayıl Qəribli qeyd edib ki, komissiya tərəfindən indiyədək keçirilmiş 16 müsabiqədə 4959 namizəd iştirak edib, onlardan 1041-i müsabiqələri müvəffəqiyyətlə başa vuraraq dövlət orqanlarında vakant dövlət qulluğu vəzifələrinə təyin olunub. Muxtar respublikanın dövlət orqanlarında inzibati vəzifə tutan dövlət qulluqçularının, təqribən, 38,3 faizi komissiyanın keçirdiyi müsabiqələrdə uğur qazanmış, müasir dünyagörüşünə malik, qanunvericilik və informasiya texnologiyaları üzrə bilikləri, habelə məntiqi düşüncə qabiliyyəti olan dövlət qulluqçularıdır.

Sonra müsabiqəni uğurla başa vurmuş və dövlət orqanlarında işə başlamış namizədlər Azərbaycan Respublikasına sadiq olacaqlarına, onun Konstitusiyasına dönmədən əməl edəcəklərinə, dövlət sirrini və xidməti sirri qoruyacaqlarına, dövlət qulluğunun onlara verdiyi hüquqları və üzərlərinə qoyduğu vəzifələri qərəzsiz, vicdanla, yalnız qanunauyğun surətdə və dövlətin mənafeyi naminə həyata keçirəcəklərinə and içiblər.

Sonra mərasim iştirakçıları Dövlət Bayrağı Muzeyi ilə tanış olublar.