Dərsliklərin monitorinqi aparılır

Elmi-metodik seminarlarda respublikanın ümumtəhsil müəssisələrində istifadədə olan 5-11-ci siniflər üzrə dərsliklərin monitorinqinə başlanılıb.

Dövlət İmtahan Mərkəzindən NUHÇIXAN-a bildirilib ki, 6-cı sinif üçün “Biologiya”, 6 və 10-cu siniflər üçün “Ümumi tarix” dərsliklərinin müzakirəsi aparılıb.

Seminarlarda Bakı, Sumqayıt şəhərlərinin və bir neçə rayonun ali və tam orta təhsil müəssisələrinin müəllimləri, metodistlər və Azərbaycan Milli Elmlər Akademiyasının müvafiq sahələr üzrə mütəxəssisləri iştirak ediblər.

Biologiya fənni üzrə seminarda biologiya üzrə fəlsəfə doktoru Tariyel Eybətov, tarix fənni üzrə seminarda isə Bakı şəhəri 202 nömrəli tam orta məktəbin müəllimi Nuriyyə Hümmətova dərsliklərlə bağlı təqdimatlar ediblər. Seminar iştirakçıları dərsliklər haqqında fikir və təkliflərini bildiriblər.

Müzakirələr nəticəsində dərsliklərdə üst-üstə düşməyən faktlar, mübahisəli məqamlar, təlim materiallarındakı uyğunsuzluqlar müəyyənləşdirilib. Bu qeydlər bankın təkmilləşdirilməsində və yeni tapşırıqların hazırlanmasında nəzərə alınacaq.

Növbəti seminarlarda müzakirələr davam etdiriləcək.