Naxçıvanda “Şagird-məzun” dövlət elektron məlumat sistemi ilə bağlı seminar təşkil olunub

Dövlət İmtahan Mərkəzinin (DİM) Naxçıvan Muxtar Respublikası regional bölməsində 2018-2019-cu tədris ilində ümumtəhsil müəssisələrinin şagirdləri haqqında məlumatların “Şagird-məzun” dövlət elektron məlumat sisteminə daxil edilməsinin başlanması ilə əlaqədar seminar keçirilib.

DİM-dən NUHÇIXAN-a bildiriblər ki, seminarda regional bölmə əməkdaşları tərəfindən şəhər (rayon) təhsil şöbələrinin və ümumtəhsil müəssisələrinin əlaqələndiricilərinə “Şagird-məzun” dövlət elektron məlumat sisteminin iş prinsipi haqqında geniş məlumat verilib. Ötən ildə məlumatların sistemə daxil edilməsi ilə bağlı yol verilən nöqsanlar iştirakçıların diqqətinə çatdırılıb. Eyni zamanda, seminarda 2019-cu ildə imtahanların keçirilmə texnologiyasında nəzərdə tutulan yeniliklər və imtahan modeli, “Nəzarətçilərin elektron qeydiyyatı” sistemi və nəzarətçi bazasının formalaşdırılması ilə bağlı məlumatlar verilib.

Sonda iştirakçıların sualları cavablandırılıb.