Culfa rayon Mərkəzi Stadionu istifadəyə verilib
NUHÇIXAN xəbər verir ki, Naxçıvanda yenilənən idman obyektlərindən biri də Culfa rayon Mərkəzi Stadionudur. Stadion müasir standartlara cavab verə biləcək şəkildə təmir olunub, ətrafındakı çəpərlər boyanıb. Həmçinin meydançanın ətrafındakı bordürlər yenilənib, tamaşaçılar üçün nəzərdə tutulan səkilərə kilid daşlar döşənib. Uzunluğu 100, eni isə 60 metr olan təbii ot örtüklü stadionun ərazisində 80 nəfərlik oturacaqlar quraşdırılıb. Bununla yanaşı, stadionun ərazisində voleybol və basketbol, mini-futbol meydançaları, ehtiyat oyunçular üçün kabinlər də inşa edilib. Ərazidə idman qurğuları quraşdırılıb, qaçış və uzunluğa tullanma yarışlarının keçirilməsi üçün şərait yaradılıb. Stadionun sulama sistemi də yenidən bərpa olunub və su nasosları yeniləri ilə əvəzlənib.
Açılış mərasimində çıxış edən Naxçıvan Muxtar Respublikasının Gənclər və İdman naziri Azad Cabbarov bildirib ki, Naxçıvan Muxtar Respublikası Ali Məclisi Sədrinin tapşırığına əsasən rayon və kəndlərdə uşaq və yeniyetmələrin futbola olan marağının daha da artırılması məqsədi ilə Şərur rayonunda 5, Kəngərli rayonunda 1, Culfa rayonunda 2 olmaqla, ümumilikdə 8 stadion əsaslı təmir olunaraq istifadəyə verilib.
Stadionunun yenidən qurularaq gənclərin ixtiyarına verilməsini muxtar respublikada idmanın inkişafına növbəti töhfə olduğunu deyən Naxçıvan Muxtar Respublikası Futbol Federasiyasının sədri Səbuhi Şahverdiyev bildirib ki, muxtar respublikanın şəhər və rayonlarında, kəndlərində idmanın kütləviliyinin təmin olunmasına hər zaman xüsusi diqqət yetirilir.
Daha sonra tədbir iştirakçıları yeni istifadəyə verilən stadionda futbol üzrə muxtar respublika çempionatının 7-ci turu çərçivəsində oynanılan Culfanın “Əlincə” və Şahbuzun “Batabat” komandalarının görüşünü izləyiblər.
Emil Səmədov