NUHÇIXAN xəbər verir ki, Naxçıvan Muxtar Respublikası Səhiyyə Nazirliyində məktəblərdə və bağçalarda tibbi xidmətin təşkili ilə əlaqədar tədbir keçirilib. Səhiyyə nazirinin müavini Samrat Gəncəliyeva tədbirdə bildirib ki, yeni tikilən təhsil müəssisələrinin hər birində məktəblilərə ilkin tibbi xidmətin göstərilməsi üçün hər cür şərait yaradılıb. Bu da uşaqların dispanserizasiyasında, peyvəndlərin vaxtlı-vaxtında aparılmasında, infeksion xəstəliklərin erkən aşkar olunaraq qarantin müddətlərinin təyin olunmasında, uşaqların düzgün qidalanması və sağlam həyat tərzi ilə əlaqəli maarifləndirici söhbətlərin aparılmasında daha çox özünü göstərir. Qeyd olunub ki, buna görə də məktəblərdə və digər təhsil ocaqlarında tibbi xidmətin daha da yaxşılaşdırılması məqsədilə bir sıra tədbirlər həyata keçirilib.
Təhsil Nazirliyinin Ümumtəhsil Məktəbləri və Liseylərlə iş Şöbəsinin müdiri Abdulla Əsgərov qeyd edib ki, təhsil müəssisələrində tibbi xidmət iş qrafikinə uğyun şəkildə təşkil edilir. Şagirdlərin profilaktik müayinəsi, peyvəndlərin vurulması təhsil müəssisələrinin rəhbərliyi ilə əvvəlcədən razılaşdırılmış qrafik üzrə aparılır.
Vurğulanıb ki, tibb işçiləri pedaqoji kollektivlə birlikdə uşaqların siyahıya alınmasında, onların təhsilə hazırlığının müəyyən edilməsində, təhsil alanların uyğunlaşma rejimi üzrə və peşə yönümünə görə istiqamətləndirilməsində yaxından iştirak edir.
Sonra tədbir iştirakçılarının sulları ətraflı şəkildə cavablandırılıb.
Cavid Səfərli