Gürcüstanın Acarıstan Muxtar Respublikası Hökumətinin sədri Naxçıvanda işgüzar səfərdə olub
İyunun 27-də Gürcüstanın Acarıstan Muxtar Respublikası Hökumətinin sədri Zurab Pataradze Naxçıvan Muxtar Respublikasında işgüzar səfərdə olub.
NUHÇIXAN xəbər verir ki, Naxçıvan Muxtar Respublikası Ali Məclisinin Sədri Vasif Talıbov Gürcüstanın Acarıstan Muxtar Respublikası Hökumətinin sədri Zurab Pataradze ilə görüşüb.
Ali Məclisin Sədri qonağı salamlayıb, Azərbaycanın Naxçıvan Muxtar Respublikası ilə Gürcüstanın Acarıstan Muxtar Respublikası arasında iqtisadi-ticarət, təhsil, səhiyyə və digər sahələrdə əlaqələrin inkişaf etdiyini bildirib. Əlaqələrin genişləndirilməsi üçün potensialın olduğunu qeyd edən Ali Məclisin Sədri dostluq və qarşılıqlı əməkdaşlığa əsaslanan münasibətlərimizin bundan sonra da genişlənəcəyinə əminliyini ifadə edib.
Acarıstan Muxtar Respublikası Hökumətinin sədri Zurab Pataradze göstərilən diqqətə görə minnətdarlıq edib, Naxçıvanda olmaqdan məmnunluğunu bildirib. Hər iki muxtar qurum arasında həyata keçirilən qarşılıqlı səfərlərin əhəmiyyətinə toxunan Zurab Pataradze qarşılıqlı əlaqələrin inkişafının əhəmiyyətini vurğulayıb.
Söhbət zamanı Naxçıvan və Acarıstan muxtar respublikaları arasında əlaqələrin inkişaf perspektivləri, eləcə də qarşılıqlı maraq doğuran digər məsələlər müzakirə olunub.
***
Həmin gün Acarıstan Muxtar Respublikası Hökumətinin sədri Zurab Pataradze muxtar respublikanın istehsal və sənaye müəssisələrində olub.
“Cahan Tabak” Məhdud Məsuliyyətli Cəmiyyətində qonağa məlumat verilib ki, şirkətdə tütün məhsulları istehsal olunur. Müasir avadanlıqlarla təchiz edilmiş müəssisənin istehsal gücü dəqiqədə 3 min ədəd filtrli siqaretdir. Şirkətdə istehsal prosesinin keyfiyyətli xammal və beynəlxalq standartlara cavab verən texnologiyaya əsaslanması daxili bazarda tələbatı ödəməklə yanaşı, ixrac imkanı da yaradır. Qeyd olunub ki, xammala olan tələbatın yerli istehsal hesabına ödənilməsi diqqətdə saxlanılır. Ötən il Kəngərli rayonunda “Cahan Tabak” Məhdud Məsuliyyətli Cəmiyyəti tərəfindən yeni Tütün Yetişdirmə Təsərrüfatının yaradılması da yerli istehsalın artırılmasına hesablanıb.
“Gəmiqаyа Dаş Məhsullаrı Sənаyе Коmplеksi” Məhdud Məsuliyyətli Cəmiyyəti ilə tanışlıq zamanı qeyd olunub ki, cəmiyyətin Naxçıvan şəhərində, Babək rayonunun Araz və Kəngərli rayonunun Qarabağlar kəndlərində istehsal müəssisələri, Kəngərli rayonunun Qarabağlar və Çalxanqala kəndlərinin ərazilərində isə daş karxanaları fəaliyyət göstərir. Müəssisədə yеrli хаmmаldаn səmərəli istifаdə olunur. İstehsal edilən tikinti materialları muхtаr rеspublikаmızdа аpаrılаn quruculuq tədbirlərinin dаhа geniş vüsət аlmаsınа imkan vеrir. Qarabağlar və Çalxanqala kəndləri ərazilərindəki yataqlardan çıxarılan travertin və mərmər daşlar emal üçün Naxçıvan şəhərində yerləşən müəssisəyə gətirilir. Məhsul buraxılışında istifadə edilən daşlar təbii antibakterial keyfiyyətə malikdir. Gündəlik istehsal gücü 2000 kvadratmetr olan müəssisədə klassik ağ və qara suyollu travertin məhsulları ilə yanaşı, Naxçıvan sədəfi və qara inci mərmər də istehsal edilir.
“Cahan Sənaye Kompleksi” Məhdud Məsuliyyətli Cəmiyyəti ilə tanışlıq da maraqla qarşılanıb. Diqqətə çatdırılıb ki, müəssisənin istilik panelləri sahəsinin gücü ayda 9500 metr panel və 8000 metr alüminium radiator, dam örtükləri sahəsinin gücü isə ayda 250 min kvadratmetr metal dam örtüyüdür. Standartlara uyğun istehsal olunan məhsulların 20 faizi yerli tələbatı tam ödəyir, 80 faizi isə ölkəmizin digər bölgələrində və xarici bazarlarda satışa çıxarılır. Plastik boru, profil və aksesuarlar istehsalı müəssisəsi də nümayəndə heyətinin diqqətini cəlb edib. Bildirilib ki, 14 min kvadratmetr sahəsi olan müəssisə istehsal sahəsindən, idarəetmə və iş otaqlarından, laboratoriya, hazır məhsul və xammal anbarlarından ibarətdir. İstehsal sahəsində tam avtomatlaşdırılmış avadanlıqlar quraşdırılıb. İstehsal gücü ayda 1500 ton olan müəssisədə 7 növdə və 160 çeşiddə məhsul istehsal olunur.
Acarıstan Muxtar Respublikasının nümayəndə heyəti Naxçıvan şəhərində aparılan abadlıq-quruculuq işləri ilə də tanış olub.
Gürcüstanın Acarıstan Muxtar Respublikası Hökumətinin sədri Zurab Pataradze kütləvi informasiya vasitələrinə müsahibə verib.