Əcnəbi turistlər yenə Naxçıvandan yazdılar - FOTOLAR
Artıq yay istirahəti başa çatdıqca bu mövsümdə Naxçıvanı gəzən əcnəbi turistlərin sosial şəbəkələrdə muxtar respublika ilə bağlı rəyləri və fotoları da çoxalır. Sevindirici haldır ki, Naxçıvanın tarixi abidələri, milli dəyərləri və gəzməli yerlərinə səyahət edən əcnəbilərin təmsil etdikləri ölkələrin coğrafiyası və fikirləri də müxtəlifdir. Məsələn, Tailanddan olan Richi Hongladaromp adlı xanım Duz dağın maraqlı mənzərələrini, rəngbərəng təpələri və onların arasından uzanan duz çayını öz instaqram səhifəsində paylaşıb.
Çinli aşpaz Kelvin Çong öz səhifəsində Naxçıvan lavaşı, təndir çörəyi və badam görüntülərini paylaşaraq dostlarını bunlardan dadmağa dəvət edib. İndoneziyalı Suharti adlı instaqram istifadəçisi Naxçıvanda keçirdiyi tətil günlərinin xoş xatirələrini fotolarla öz izləyicilərinə təqdim edib. Fotolarda Ümummilli liderin heykəli, Naxçıvan şəhərinin təmiz xiyabanları və küçələr öz yerini alıb. İndoneziyalı xanım Duzdağ ərazisində qədim duz quyusunun üzərindəki çarxın fotosunu paylaşmaqla “Görəsən əcnəbilər yox, elə Naxçıvan sakinlərindən də kimsə bu nadir mənzərələri görübmü?” deyə maraqlı bir müraciət də edir. Makimişa adlı Yaponiyadan olan səyahətçi xanım öz səhifəsində Naxçıvan İslam Mədəniyyətinin Paytaxtı loqosunu və “Təəssüf ki, əlvida Naxçıvan deməyin vaxtı çatıb” yazaraq hava limanının yolundakı lövhəni verib.
Stefani adlı Amerikalı xanım Naxçıvanda yalnız bir nəfər amerikalı turist ilə qarşılaşdığını təəssüflə bildirib. “Amerikalılar bura tez-tez gəlməlidirlər. Naxçıvanı Azərbaycan torpağının əsas hissəsindən Ermənistan ayrır. Burada nadir yerlər var. Kim 180 dərəcəlik bucaqda gözəl mənzərə görmək istəyirsə mənə inanmalıdır ”-deyən xanımın paylaşdığı tarixi abidələr və Haçadağın fotoları geniş izləyici marağına səbəb olub. “Tripsanquips” niki ilə Naxçıvandakı Nuhun türbəsindən foto paylaşan Markovkin soyadlı ukraynalı səyyah bura gəlişində məqsədinin də məhz bu türbəni ziyarət etmək olduğunu bildirir. Özünü səyyah kimi təqdim edən yapon əsilli amerikalı Celvin Sun- moonsundiaries adlı instaqram istifadəçisi, Əlincəyə 1600 pillə ilə qalxaraq dağların zirvəsində qədim döyüş meydanına bir anda necə düşməyin həzzini anladır. Yaponiyalı bəstəkar Tomohişa Suopi Suzuki Naxçıvanqala və Əlincəqalada olan şəkillərini yayımlayıb. Travelerclub Batabatı, Naxçıvana səfər edən Sloveniyalı rəssam Nik Aniks isə üçrəngli Azərbaycan bayrağının fotolarını paylaşıblar. Yoqa təlimi ilə məşğul olan fransız Liz Lamport Əlincəqalanın fonunda bu təlimə uyğun olan şəklini qoymaqla burada olan yüksək aura və enerji axınından bəhs edib. Həmçinin Ordubad və Duzdağdan da şəkillər paylaşıb. Naxçıvanda olan Yok Pimpattra adlı Bankoklu xanım daha çox Mömünə xatın türbəsinin, britaniyalı “britishbacpakersociety” adlı istifadəçi isə Nuhun məzarüstü abidəsinin şəklini paylaşıblar. Britaniyalı qonaq “ Avropa ilə Asiyanın kəsişməsində, Yaxın Şərqdə səyahətçilər tərəfindən kəşf edilməyən bir torpaq var. İngilis Backpacker Cəmiyyəti bunu yoxlamağa qərar verdi”- yazır. Backparker Cəmiyyəti turizmlə məşğul olan ingilis səyyahlarının cəmiyyətidir.
Səməd Canbaxşiyev
Anar Tağıyev
NUHÇIXAN